തൂവൽ

അറബിക്കടലിൽ നിന്ന്
വീശും കാറ്റത്ത്
നിരത്തുകളെന്ന് കരുതുന്ന
ഒഴുക്കിലേക്ക്
നോക്കിനിൽക്കുന്നു
മൂന്നാംനിലയുടെ
മുകളിലയാൾ; കപ്പിത്താൻ.

പണിയില്ലാണ്ടായി
കപ്പലോ വിറ്റുംപോയി
കാറ്റയാളുടെ തൂവൽതൊപ്പി തരിപ്പണമാക്കി.

എന്നാൽ, ഒരൊറ്റത്തൂവൽ മാത്രം
പറിഞ്ഞില്ല, പറന്നില്ല
നെറ്റിയിൽ പണ്ടേയത്
തറഞ്ഞുപോയിരുന്നതിനാൽ.

നിരത്തുകൾ
തപ്പി തിരഞ്ഞുനടക്കും
രാത്രിസഞ്ചാരിക്ക്
വെണ്ടുരുത്തിപ്പാലത്തിക്കിടന്ന്
ഒരു തൂവൽ കിട്ടി.

ചോരപുരണ്ട ആ തൂവൽ
അയാളെനിക്ക്
വച്ചുനീട്ടി.